O‘zbekiston Respublikasi Kambag‘allikni qisqartirish va bandlik vazirining buyrug‘i (O‘zbekiston Respublikasi Adliya vazirligi tomonidan 2023-yil 14-avgustda ro‘yxatdan o‘tkazilgan, ro‘yxat raqami 3451) bilan ishga qabul qilish chog‘ida tanlov o‘tkazish to‘g‘risidagi namunaviy nizom tasdiqlandi.
Mazkur Namunaviy nizom mulkchilik shaklidan va idoraviy mansubligidan qat’i nazar, tashkilotlarga ishga qabul qilish chog‘ida tanlov o‘tkazish tartibini belgilaydi.
Ushbu Namunaviy nizom talablari ishga qabul qilish uchun tanlov o‘tkazish tartibi alohida qonunchilik hujjatlari bilan belgilangan tashkilotlarga nisbatan tatbiq etilmaydi.
Tanlov komissiyasi tarkibi tashkilotning xodimlari va tegishli sohaning malakali mutaxassislari orasidan kamida besh kishidan iborat va toq sonli tarkibda shakllantiriladi. Nizomda Tanlov komissiyasining huquq va majburiyatlari, tanlov o‘tkazish bosqichlari keltirib o‘tilgan.
Shuningdek, Nizomda nomzodlarning apellyasiya shikoyatlarini ko‘rib chiqish uchun tashkilot rahbarining buyrug‘i bilan tashkilotning kamida besh nafar mutaxassislaridan iborat tarkibda Apellyasiya komissiyasi tashkil etilishi, bunda, Apellyasiya komissiyasi tarkibiga boshqa davlat organlari va tashkilotlaridan ham mutaxassislar kelishuv asosida jalb etilishi mumkinligi nazarda tutilgan.
Namunaviy nizom bilan batafsil tanishish: https://lex.uz/docs/6567038
Tuman hokimligi bosh yuriskonsulti Sh.Xidirov