Xalqimiz azaldan ijodkorlarni e’zozlab kelgan. Ularning ijod mahsullarini qalb qo‘rida ardoqlab, avaylashga harakat qilgan. Qalblardan chuqur joy egallagan o‘lmas satrlar esa tildan tilga ko‘chib, xalqning ijodiy durdonasiga aylangan.

Paxtachi tumanidagi Nurafshon mahallasida yozuvchi va shoir Farmon Toshev bilan o‘tkazilgan badiiy uchrashuv o‘ziga xos tarzda she’rxonlik tadbirlari bilan boshlandi. Dastlab, ijodkorning to‘rtta kitobdan iborat “Saylanma”sidan joy olgan she’rlari ishtirokchilar nigohida quvonch va hayajonni aks ettirib, zo‘r olqish bilan tinglandi. So‘ngra tumandagi 13-umumiy o‘rta ta’lim maktabi o‘qituvchilari hamda Nurafshon, Obodon va Mirza Salimiy nomli mahallalarda yashovchilar F.Toshev hikoya va qissalarini sevib mutolaa qilishlarini aytib, she’rlaridan namunalar o‘qishdi.

Uchrashuv so‘ngida Farmon Toshev ijodiy uchrashuvda faol bo‘lganlar va 13-maktab kutubxonasiga o‘zining badiiy kitoblaridan tuhfa qildi. Mazkur tadbir va unda kechgan ijodiy muhit barcha yig‘ilganlar qalbidan chuqur joy egalladi.