Махсус имкониятлар
Қадрли устозлар, меҳридарё ўқитувчи ва мураббийлар!
Ҳар биримиз қўлимизга қалам бериб, ҳарф танитган биринчи ўқитувчимизни умрбод унутмаймиз. Фидойилик билан меҳнат қилиб, билим берган муаллимларимиздан фахрлансак, ҳаққимиз кетмайди. Сиз, ўқитувчилар, ана шундай мураккаб ва шарафли касбни танлаганингиз, улуғ устозларингизга издош ўлароқ уларнинг табаррук ишларини давом эттираётганингиз қалбимизни қувонтиради.
Ҳазрат Навоий “Инсон зебу зийнати билим ва одобдир. Уларни шогирдларига сингдирган устозларгина чинаккам устоздир!”, деган эди. Сизлар шундай ҳикматли сўзларга амал қилиб, ёшларга таълим бериш баробарида уларга баланд инсонийлик фазилатларини сингдираётганингиз ҳам жасоратдир.
Давлатимиз раҳбарининг “Биз учун долзарблиги ва аҳамиятини ҳеч қачон йўқотмайдиган масала бу – фарзандларимизни мустақил фикрли, замонавий билим ва касб-ҳунарларни эгаллаган, мустаҳкам ҳаётий позицияга эга, чинакам ватанпарвар инсонлар этиб тарбиялаш вазифасидир”, деган таърифи, албатта, Сизларнинг нақадар юксак шарафга лойиқлигингизни англатади.
Шуни таъкидлаш керакки, юртимизда эртамиз эгаларини тарбиялаш ва камолотга етказиш, устоз-мураббийлар меҳнатини қадрлаш йўлида олиб борилаётган изчил ислоҳотлар, қабул қилинаётган муҳим дастур ва қарорлар, қад ростлаётган замонавий муассасалар ва кенг шароитлар бугун барчамизни, айниқса устозларимизни янада янги марраларга, кучли ва билимдон шогирдлар тайёрлашга даъват этмоқда.
Бугун туманимизда 41 та давлат мактабгача таълим ташкилотлари мавжуд бўлиб, айни вақтда уларнинг 4 тасида қурилиш-таъмирлаш ишлари давом этмоқда. Халқ таълими тизимидаги 47 та мактабимизда 2 239 нафар педагоглар 25 533 ўқувчига дарс беришмоқда. Уларнинг 5 нафари давлатимизнинг юксак мукофотларига сазовор бўлган бўлса, 8 нафари “Халқ таълими аълочиси” кўкрак нишони соҳиби, 56 нафари олий, 239 нафари биринчи, 802 нафари иккинчи тоифали бўлган ўқитувчилардир. 2019-2020 ўқув йилида туман умумий ўрта таълим мактабларини 1939 нафар ўқувчи битириб, етуклик аттестатларини қўлига олишди. Битирувчиларнинг 38 нафарига олтин, 3 нафарига кумуш медаллари насиб этди.
Биздаги маълумотларга кўра, жорий йилда мактабни тамомлаган ёшларимизнинг олий таълим муассаса-ларига ўқишга кириш кўрсаткичи 291 нафарни ташкил этиб турибди. Биз умид қиламизки, уларнинг сони ҳали ортади. Яна қувонарли томони шундаки, 4 нафар ўқувчимиз нуфузли хорижий, 2 нафари ҳарбий билим юртлари талабаси бўлиш бахтига муяссар бўлди. Бу эса вилоятимизда туманимиз битирувчиларининг олий таълимга киришда пешқадамлар сафида бораётганини кўрсатмоқда.
Фидойи устозларимиз ва уларнинг ўқувчилари республика танловларида ҳам фахрли ўринларни эгаллашмоқда. Бу борада тумандаги 24-мактаб-нинг ютуқлари салмоқли бўлмоқда. Хусусан, китобхонликни тарғиб этувчи кўрик-танловнинг республика босқичида “Ёш китобхон” жамоамиз фахрли тўртинчи ўринни, 33-мактаб битирувчиси Асадбек Бобоқулов “Ёшлар илм-фан учун” республика танловида фахрли биринчи ўринни эгаллаши кишида чексиз ифтихор туйғуларини уйғотади.
Жорий йилда таълим муассасалари шарт-шароитларини яхшилаш борасида кўплаб ишлар амалга оширилди. Маҳаллий бюджет ҳисобидан 3 та мактаб (39-, 36-, 12-) капитал таъмирланди. 20 та мактабда жорий таъмирлаш ишлари олиб борилди. Ва ниҳоят шу йил Пахтачи туман халқ таълими бўлими ўз биносига эга бўлди.
Туманимизнинг таълим соҳасидаги ютуқларини санайверсак адо бўлмайди. Юртбошимиз томонидан азиз устозларимиз меҳнатлари муносиб баҳоланиб, бир гуруҳ ўқитувчи-мураббийларни турли давлат мукофотлари билан тақдирлангани ифтихор ила шижоатга ундайди.
Муҳтарам устозлар!
Сиз азизларни ва сизлар орқали туманимизнинг барча таълим жонкуярларини 1 октябрь – “Ўқитувчи ва мураббийлар куни” билан яна бир бор муборакбод этаман. Сизларга мустаҳкам соғлик, хонадонингизга тинчлик-хотиржамлик, фаолиятингизда улкан ютуқлар тилайман. Шарафли касбингиз ортидан ҳамиша эл-юрт ардоғида бўлинг!
Байрамингиз муборак бўлсин!
Пахтачи тумани ҳокими
М.Хамдамов
